Mat 10 | MMO | STEP | (Maak 3:13-19 Luk 6:12-16) Yesu teey yite maanggêêm nomaayuuh-ambe laam yuuh-ato lalaam-ambe vu niwêêk vu sil in nambe sil gatiiy mamu nipaya na in omaahonôôn, de lambiing hil anind lakin osin hil anind paling pin-ambe nind vasa jak.

Matthew 10

Yesu-te maanggêêm nomaayuuh-ambe laam yuuh-ato haalend

(Maak 3:13-19 Luk 6:12-16)

1 Yesu teey yite maanggêêm nomaayuuh-ambe laam yuuh-ato lalaam-ambe vu niwêêk vu sil in nambe sil gatiiy mamu nipaya na in omaahonôôn, de lambiing hil anind lakin osin hil anind paling pin-ambe nind vasa jak. 2 De sinaale-so nomaayuuh-ambe laam yuuh haalend-anjo, omaaho sen munggin ond Simon, haale ango nambe Pita, de hali Endru, tonde Sebedi noow Jems ayuuh hali Jon, 3 tonde Pilip ayuuh Batolomai, de Tomas ayuuh Matai sen nako taakis-ato**, tonde Alpias noow Jems, de Tadias, 4 tonde Simon ango sen naanjiihin hil Yuda in nambe gatiiy hil Lom lanaa-to, de Yudas Iskaliot sen taato Yesu langaah-ambe hil lalôôh-ato. - (1) Maak 6:7 Luk 9:1*

Yesu nêêl tanasin vu maanggêêm-aso de wiing sil lala kul

(Maak 6:7-13 Luk 9:1-5)

5 Yesu wiing hil nomaayuuh-ambe laam yuuh-anju lala kul, om nêêl tanasin vu sil nambe, “Ham-ame anoh hil vaalu sen sil-ame Yudaa-to silate mop e, de ham-ame andukana Samaalia-te taaku ti le, 6 ham oo ana vu hil Islel in sil lalohvu sipsip-ambe dala mend nama. 7 Ham ana naanêêl langaah naambe, ‘Ngaaho lak in Anutu ganggin yite hil.’ 8 Ham ambiing hil anilakin nind vasa jak, de ham anjêêvu hil yimbin-ambe kandi jak, de ham ambiing hil anind payêês anipaya lôôt-ato nind vasa jak, osin ham gatiiy mamu nipaya lana in omaahonôôn. In saavu niwêêk vu ham-ato ond ham hako malis-ande vaanggosin ma, om yik ham ambiing kul jak malis amu vu hil, de ham-ame gako mone jak e. 9 De ham-ame gako mone gool osin siliva having mone noow dombaale hamate gis e, 10 de ham-ame ganja vaahes-ambe ham ana mop e, de ham-ame gako lolop yu-yuuh e, de ham-ame gako suul osin paatôôn e, jip, in kul sen ham ambiing vu hil-ato ond yoo neep vu sil in nambe landôôvu ham in vanôôn ayuuh ame.

11 “Ham andukana taaku bop ti, me bayêên pasiv ti, ond ham anjingin hil-anju naambe ti nivasa lohvu ganggin ham ond ham mando gaving yi nivalok-ambe na balup busin sen ham ana jak-ato. 12 Tonde ham andukana bayêên alo ond ham naanêêl vakasin anivasa vu hil-anju. 13 Naambe hil sen ham alakala vu sil-anju nind vasa, ond mem hamate vakasin melaas e na vu sil, le naambe sil-ame nind vasa le, ond hamate vakasin melaas e gilin-ambe nom vu ham. 14 Naambe vaheey-ame gako ham jak e, de me-gango hamate vakasin e, ond ham gavuuh bayêên-anju me taakuu-ju, de ham tatehin kambus sen nando lak ham vaham-ato naah-ande ham ana. 15 Sa naanêêl keen

vu ham naambe vu busin taamusin sen Anutu gangoyin omaahonôôn-ate vakasin-ato, ond hil vu taakuu-ju le daatovu nimeen bopaata kaluuh Sodom osin Gomola.” - (5) Sinaale 13:46* - (6) Jer 50:6 Matai 15:24* - (7) Matai 3:2 4:17 Luk 10:9,11* - (8) Sinaale 20:33* - (9) Luk 10:4* - (10) Nam 18:31 Luk 10:7 1 Kolint 9:14 1 Timoti 5:18* - (12) Luk 10:5-6* - (14) Luk 10:10-12 Sinaale 13:51 18:6* - (15) Matai 11:24 Jen 18:20-19:28 2 Pita 2:6 Jut 7*

Nimeen ngeeyaata le naam

(Maak 13:9-13 Luk 21:12-17)

16 “Ham gango, saambiing-ambe ham ana naambe sen bik sipsip-ato melaas in nambe ham andukana voow bamaan lavuun, om ham oo angge hamate mop nivasa naambe nyêêy, de ham ambiing va melaas naambe manak sen nawiing melaas-ato. 17 Om ham ganggin ham nivasa in hil, in sil e gako ham ana vu kaansol-aso be ham ambiing vakasin, de sil e gaveek ham dôôk silate dumb alo. 18 De sil e gako ham ana baale hôôk yêêv bop osin omaaho lulemak-aso mend in sate hil ham, tombe ham e naanêêl sa banyengg langaah vu yêêv-asôônju, de vu hil vaalu sen sil-ame Yudaa-to gaving. 19 Om hil gako ham ana in ham ambiing vakasin, ond ham-ame naham jak naambe ham

e ambiing vakasin naambe tana me ham e naanêêl vaati, malis, yik Anutu yoo le taato va sen ham naanêêl-ato hôôk busin tii-ju vu ham bulôôt. 20 Ham-ame yoo le naanêêl vakasin e, malis, nganjo Mom-ate Vavi Vaambuung e dôôvu ham in vakasin.

21 “Omaahonôôn e daanêêl halindin langaah, tombe lanyiis sil-ambe lanjimb, de yik maandin e lambiing naambêênju vu noondin. Tonde yik unoopasiv e lanji maandin ayuuh taandin paya be daanêêl sil langaah, tombe hil lanyiis sil-ambe lanjimb. 22 De omaahonôôn pin e nind baya lôôt in ham in sate hil ham, om ham baale niwêêk lôôt-ambe ham baaku nimeen pin, ond ham e ana mando metumin gaving Anutu. 23 De hil lambiing nindanjeen vu ham dôôk taaku ti, ond ham napakambe ham ana taaku ango. Sa naanêêl keen vu ham naambe ham-ame le anohvu Islel-ate taaku pin e, tonde Omaahonôôn Noow e nom.

24 “Unoopasiv-ame savok yite kaputung e, de kul vaha me-savok yite yêêv e. 25 Naambe unoopasiv mando naambe yite kaputung ond lung, de kul vaha

mando naambe yite yêêv ond lohvu. Lanêêl mamu nipaya-te yêêv Belsebul lak bayêên danggakook sa, om yik le daanêêl yêêv anipaya heey jak sate hil

gaving.” - (16) Luk 10:3 Jon 10:12 Sinaale 20:29 Lom 16:19* - (17) Matai 24:9* - (18) Sinaale 25:23 27:24* - (19-20) Luk 12:11-12* - (20) Jon 14:26 1 Kolint 2:4* - (21) Mai 7:6 Matai 10:35* - (22) Matai 24:9,13 Jon 15:18-21* - (23) Matai 16:28* - (24) Luk 6:40 Jon 13:16 15:20* - (25) Matai 9:34 12:24 Maak 3:22 Luk 11:15*

Omaahonôôn lanjêênin Anutu

(Luk 12:2-7)

26 “Om ham-ame anjêênin hil e, in vakasin p sen neep vunin-ato ond le naatok naam langaah, yik vakasin pin sen hil akand navu be neep hôôk londpayôô-to ond taamusin hil e lanjak ni pin. 27 Tanasin sen yiiy oo nando de sa naanêêl vu ham-ato ond ham naanêêl na langaah, yik vakasin sen ham oo nangoyin-ande sa naanêêl-ato ond ham ana baale talind-ambe ham naanêêl vu hil pin. 28 Ham-ame anjêênin omaahonôôn in nambe le lanyiis ham anim naavi jimb, in sil-ame lalohvu nambe lanyiis ham kanum e. Nganjo ham oo anjêênin Anutu in yoo lohvu nambe nyiis ham anim naavi osin ham kanum hôôk taaku nipaya. 29 Hil daanggo manak taapêêv daka yuuh lak mone noow timu, lemu manak pasiv pasiv-anjuuto ti

me-le dupake malis e, nganjo hamate Mom sen nando baandonii-to jiinggis ond mem. 30 De ham ond sevin ham alumvalus pin lôôt lung la, 31 om ham-ame anjêênin e, in ham atu Anutu-te va-so savok manak pasiv pasiv-anju pin.” - (26) Maak 4:22 Luk 8:17* - (28) Jems 4:12* - (31) Matai 6:26 12:12*

Yiiy naanêêl Yesu haale langaah

(Luk 12:8-9)

32 “Omaaho ti naanêêl sa haalengg langaah vu hil ond sale naanêêl omaaho tii-ju haale langaah vu Aamangg sen nando baandonii-to, 33 le naambe omaaho ti jak alu in sa vu hil ond sale anjak alungg in yi vu Aamangg sen nando baandonii-to.” - (32) Taato 3:5* - (33) Maak 8:38 Luk 9:26 2 Timoti 2:12*

Yesu laam in ngaamong

(Luk 12:51-53 14:26-27)

34 “Ham akam-ame bu naambe sa laam in aambu mamaal vu voon e. Same alaam in aambu mamaal e, malis, sa laam in ngaamong. 35 Sa laam atombe hil daasuh sil in sa, om noondin alondpayo le na ango, de maandin alondpayo le na ango, tonde nondinaavêêh alondpayo le na ango, de taandin alondpayo le na ango, tonde vêêh-aso londpayo le na ango, de yendinaavêêh alondpayo le na ango, 36 de hil sen dando lak bayêên timuu-to ond yoo le lanji sil paya lôôt.

37 “Omaaho ti ahe having mangganaan me tangganaan savok sa, ond me-lohvu nambe naatu sate hil e, de omaaho ti ahe having noow me nowaavêêh savok sa, ond me-lohvu nambe naatu sate hil e. 38 De omaaho ti me-baaku yite haah pako ^{▼▼Matai 10:38 *Yêêv Lom-aso danêêl nambe omaaho ti wiing va nipaya om lanyiis dukanaah nyevahaan-ambe jimb, ond layiis lakala haah pako in nambe bu nimumin vu yi osin yite hil. Tonde Yesu nêêl nambe omaaho ti wiingin nambe sapa yi ond yoo baaku yite haah pako be sapa yi, ond dangga nambe yame aanjêênin nimeen osin nimumin sen hil lambu vu yiiy jak Yesu haalêê-to le, yiiy baaku be yiiy oo sapa Yesu.} be taamuyin sa le, ond me-lohvu nambe naatu sate omaaho le. 39 Omaaho ti yoo ganggin ninaavi nivasa in nambe mando metumin ond le jimb-ambe na menama, le naambe omaaho ti baaku nimeen ak sa haalengg-ambe jimb, ond mem le mando metumin danggata.” - (35) Mai 7:6* - (37) Diu 33:9* - (38-39) Matai 16:24-25 Maak 8:34-35 Luk 9:23-24 17:33 Jon 12:25*

Hil e gako nyevahaan nivasa

(Maak 9:41)

40 “Omaaho ti gako ham jak ond lohvu hako sa lak, de hako sa lak ond lohvu hako omaaho sen wiing sa laam-ato lak. 41 Omaaho ti gako Anutu-te omaaho nanêêl yite vakasin-ato jak in dangga nambe nanêêl Anutu-te vakasin langaah, ond yuuh ahondoos e gako nyevahaan nivasa nanjip ti. Tonde naambe omaaho ti gako omaaho nivalok ti jak in dangga nambe yi omaaho nivalok-ato, ond yik yuuh ahondoos e gako nyevahaan nivasa nanjip ti. 42 De naambe omaaho ti bu bel kuuh vu sate hil malis ti be naanum in dangga nambe sate hil yi ti, ond sa naanêêl keenaanôôn vu ham naambe omaahôô-ju le gako yite samu samu nivasa nyevahaan dukanaah.” - (40) Maak 9:37 Luk 10:16 Jon 13:20 Galata 4:14* - (42) Matai 25:40*